شرح كل صغيرة و كبيره في  موقع و تطبيق pinterest

يا هلا بيك ياصديقي . لو كنت تبحث على مكان يخليك تسرح بخيالك وتلقى أفكار لبيتك أو لبسك أو حتى لخدمتك . فأنت أكيد لازم تعرف شن هو موقع و تطبيق pinterest . البرنامج هذا مش مجرد صور وخلاص . لا هذا عالم ثاني من الإبداع والجمال . اليوم بنهدرزو عليه بالتفصيل الممل بالليبي ونفهمو القصة من طقطق للسلام عليكم . خليك واخد قهوتك ومقمعز متبع معاي لأن الكلام كثير ومفيد. 

الواجهة الرائسية للبرنامج نلاحظ ان اغلب الصور العاب بسبب انه حساب موقعنا و ندعوكم لمتابعته لمعرفة كل جديد موقعنا

⛔ حسنا ما هو هالبينتريست هذا؟ ولماذا الدوشة عليه؟

تخيل عندك سبورة كبيرة معلقة في دارك وكل ما تعجبك صورة في مجلة قديمة  تقوم بتثبتها بالدبوس على السبورة. هو هذا بالضبط فكرة موقع و تطبيق pinterest بس بشكل إلكتروني ومتطور لدرجة جميلة . يعني هو محرك بحث بصري بالدرجة الأولى. مش زي الفيسبوك تقعد تساير في الناس وتتفرّج على أخبارهم اللي تضيق العلم . لا هنايا أنت جاي تدور في "إلهام" وتخزن في أفكار لبعيد . البرنامج هذا كنز لو عرفت كيف تستخرج منه اللي تبيه . سواء كنت مهندس ديكور أو تبي تنسق لبستك أو حتى تبحث في وصفات طبخ و غيرها من تصنيفات مثل الكرة و الصور الإسلامية و طبيعة و السيارات بأختصار كل شي في الحياة موجود في عذا الموقع الرهيب 

المميز في بينتريست إنه مش مجرد موقع تواصل اجتماعي . لا هو أداة تخطيط . يعني الناس تدخله باش تخطط للمستقبل . اللي بيأثث بيته. اللي يبي يبدأ مشروع جديد . الكل يلقى ضالته هنا. والجميل إن المحتوى فيه دائما جديد ومتجدد وعالمي . يعني تشوف أفكار من أمريكا واليابان وأوروبا وأنت في مكانك 

📍 أقسام بينتريست الأساسية وكيف تخدم

باش ما تضيعش في الازدحام. لازم تعرف إن الموضوع مقسوم لحاجات بسيطة ومهمة . ركز معاي في هذه النقاط لكي تبدا محترف.

⛔ الدبابيس أو الـ Pins

هذي هي أساس كل شي في موقع و تطبيق pinterest . أي صورة تعجبك أو فيديو قصير في الموقع يتسمى "دبوس" . الصور هذي مش مجرد ألوان وخلاص . لا هذي وراها روابط توصلك لمواقع أو مدونات تشرحلك كيف تصل لنتيجة اللي شفتها . يعني لو شفت صورة ديكور صالة سمحة . بضغطة وحدة تلقى روحك في موقع يبيع في الأثاث هذا أو يشرحلك كيف تنسق الألوان . الدبابيس هذي هي اللي تبني بيها أفكارك 

⛔ اللوحات أو الـ Boards

هنا عاد يجي دور التنظيم والترتيب . أنت لن تترك دبابيسك (الصور او الفيديوهات القصيرة) في كل مكان وما تلقاهاش بعدين . لازم ادير "لوحات" . يعني مثلاً ادير لوحة تسميها "أفكار عرس" ولوحة ثانية تسميها "أكلات عربية" ولوحة ثالثة "تنسيق ملابس شتوية" . وكل ما تلقى حاجة تمشي معاهم اديرلها حفظ في اللوحة المناسبة . هكي تبدا أمورك منظمة وما يريح منك شي . وتقدر حتى ادير لوحات سرية ما يشوفها حد غيرك لو تبي تخطط لحاجة في سكات 

⛔ اللوحات الجماعية أو Group Boards

هذي ميزة حلوة لو كنت تخدم مع فريق أو تبي تشارك أفكارك مع صحابك . تقدر ادير لوحة وتعزم فيها ناس ثانية يضيفوا دبابيسهم معاك . مثلاً لو أنت وصحابك بتسافروا سفرة . تقدروا اديروا لوحة وحدة وتجمعوا فيها الفنادق والأماكن اللي تبي تمشولها . حاجة تعاونكم هلبا في التخطيط 

📍 ليش لازم تستخدم بينتريست في حياتك اليومية؟

الموضوع مش بس صور. الفائدة أكبر من هكي 

⛔ مصدر لا ينتهي للأفكار

لو يوم من الأيام حصلت في فكرة هدية لواحد صاحبك . أو مش عارف أي وجبة ستكون اليوم للغداء ادخل على موقع و تطبيق pinterest واكتب اللي في بالك . حتطلعلك آلاف الأفكار اللي ما كانتش تخطر على بالك أصلاً . والميزة إن الأفكار هذي ديمة تكون "جديدة" وعصرية 

⛔ الراحة النفسية والبعد عن المشاكل

بينتريست يعتبر من أهدى الأماكن على الإنترنت . ما فيهش العراك بتاع تويتر ولا النفاق بتاع الانستقرام ولا الدوشة بتاع الفيسبوك . أنت وجمال الصور وبس . يعني لو تبي تهرب من ضغط اليوم . افتح التطبيق وتفرج على المناظر الطبيعية أو التصاميم المعمارية وريح بالك 

⛔ تطوير مهاراتك ومشاريعك

لو عندك مشروع صغير . مثلاً تبيعي في حلويات أو ادير في شغل يدوي . بينتريست هو أحسن مكان تتعلمي منه كيف تغلفي بضاعتك وكيف تصوريها وكيف تسوقيلها . وأيضاً تقدر تنشر صور شغلك عليه باش الناس تعرفك . لأن صور بينتريست تطلع في قوقل بسرعة البرق 

📍 الميزات التقنية اللي تخلي بينتريست "الأفضل"

الشركة اللي دارت التطبيق فكرت في حاجات ذكية هلبا 

⛔ عدسة بينتريست أو Pinterest Lens

هذي ميزة خيالية . لو شفت حاجة في الشارع . مثلاً كندرة عجبتك أو طاولة قهوة في مقهى . صورها بكاميرا التطبيق وهو حيطلعلك صور تشبهلها بالضبط ويقولك هذي من وين ومن وين تجيبها وكيف تنسقها . يعني كأن عندك خبير ذكاء اصطناعي في جيبك 

⛔ البحث البصري المتطور

لو عجبتك صورة فيها هلبا حاجات . مثلاً دار نوم فيها سرير وستارة صالون. تقدر تحدد بس على "الصالون" داخل الصورة . والتطبيق حيطلعلك كل الصالونات اللي تشبهها . مش لازم تكتب كلمات بحث . الصورة هي اللي تتكلم 

📍 كيف تطلع أحسن نتايج في البحث؟

لكي تكون خبير في استخدام موقع و تطبيق pinterest . لازم تعرف كم سر 

⛔ البحث بالانجليزي ديمة أقوى

للحق والامانة . المحتوى بالانجليزي في بينتريست أضخم. لو تبي أفكار عالمية ابحث بكلمات زي Interior design أو Street style . بس هذا ما يمنعش إن المحتوى العربي بدى يكبر وبدى فيه حاجات عربية ابداعبة 🛑

⛔ اتبع الناس اللي ذوقهم جميل

لما تلقى حد ديمة ينشر في صور تعجبك . ديرله متابعة . هكي الصفحة الرئيسية بتاعك تبدا تطلعلك في حاجات على ذوقك ديمة . والتطبيق مع الوقت حيفهمك ويولي يطلعلك في دبابيس "صور-فيديوهات" كأنها مختارة ليك أنت بالذات 

📍 بينتريست والسيو (SEO) . كلام للمحترفين

لو أنت صاحب موقع أو مدونة . بينتريست هو منجم ذهب ليك 

الصور اللي تحطها في حسابك وتقيدها بروابط موقعك . حتجيبلك زيارات مش عادية . لأن الناس لما تخزن صورك عندها . الصور هذي سوف تنتشر وتوصل لآلاف الناس بدون ما تدفع ولا قرش في الإعلانات . والمهم إن الصور هذي تقعد "معروضه" لسنين . مش زي البوست في الفيس يختفي بعد يومين 

📍 كلمة أخيرة من القلب

في نهاية . موقع و تطبيق pinterest هو المكان اللي تبدأ فيه الأحلام تولي حقيقة . هو مش بس تضيع وقت . هو استثمار في ذوقك وفي أفكارك وفي مستقبلك . ابدا من اليوم ونزل التطبيق وجمع أفكارك . وابني لوحاتك.

رابط موقع+ تطبيق "pinterest" كلمة السر"AC757566"